3 தினங்களுக்கு முன்பு மாயமான விவசாயி உடல் படுகை அணை காவிரி ஆற்றில் பிணமாக மீட்கப்பட்டுள்ளது.
நாமக்கல் மாவட்டம் ஜோடர்பாளையத்தில் உள்ள படுகை அணை பகுதியில் உள்ள காவிரி ஆற்றில் சுமார் 65 மதிக்கத்தக்க முதியவரின் பிணம் ஒன்று மிதந்து கொண்டிருந்துள்ளது. இதனை பார்த்த அப்பகுதி மக்கள் உடனடியாக காவல்துறையினருக்கு தகவல் தெரிவித்துள்ளனர். தகவல் அறிந்து சம்பவ இடத்திற்கு விரைந்து சென்ற ஜோடர்பாளையம் காவல்துறையினர் முதியவரின் உடலை மீட்டு கரைக்கு கொண்டு வந்தனர்.
இதனையடுத்து முதியவரின் உடலை பிரேத பரிசோதனைக்காக பரமத்தி வேலூர் அரசு மருத்துவமனைக்கு அனுப்பி வைத்துள்ளனர். இதனைதொடர்ந்து காவல்துறையினர் விசாரணை நடத்தியதில் உயிர் இழந்த முதியவர் ஈரோடு மாவட்டம் ஆனைக்கல்பாளையத்தை சேர்ந்த திருமலை என்பது தெரியவந்துள்ளது. விவசாயியான இவர் வீட்டில் ஏற்பட்ட சண்டை காரணமாக கடந்த 3ம் தேதி வீட்டை விட்டு வெளியேறி மீண்டும் வீட்டிற்கு திரும்பவில்லை.
இதுகுறித்து ஈரோடு மொடக்குறிச்சி காவல்துறையினர் வழக்குபதிவு செய்து திருமலையை தேடி வந்துள்ளனர். இதனை தொடர்ந்து ஜோடர்பாளையம் காவல்துறையினர் மொடக்குறிச்சி காவல்நிலையத்திற்கு தகவல் தெரிவித்து உயிரிழந்தது திருமலை என்பதை உறுதி செய்துள்ளனர். மேலும் இதுகுறித்து காவல்துறையினர் வழக்கு பதிவு செய்து திருமலை உயிரிழப்பிற்கான காரணம் குறித்து தீவிர விசாரணை மேற்கொண்டு வருகின்றனர்.