யானை தாக்கியதால் ஆடு மேய்க்கும் தொழிலாளி உயிரிழந்த சம்பவம் சோகத்தை ஏற்படுத்தியுள்ளது.
கோயம்புத்தூர் மாவட்டத்திலுள்ள ஆர்நாட்காடு பகுதியில் ஆடு மேய்க்கும் தொழிலாளியான காரை என்பவர் வசித்து வந்துள்ளார். இந்நிலையில் காரை முள்ளுகாடு நீரோடைக்கு துணி துவைப்பதற்காக சென்றுள்ளார். அப்போது திடீரென அங்கு வந்த காட்டு யானை காரையை தாக்கியுள்ளது. இதனால் தப்பி ஓட முயன்ற முதியவரை காட்டு யானை விடாமல் துரத்தி சென்று துதிக்கையால் பிடித்து தூக்கி வீசியுள்ளது.
அதன் பிறகு யானை காலால் மிதித்ததால் காரை சம்பவ இடத்திலேயே உடல் நசுங்கி பரிதாபமாக உயிரிழந்துவிட்டார். இதனையடுத்து ஆடு மேய்ப்பதற்காக அங்கே சென்ற சரஸ்வதி என்ற பெண் காரை இறந்து கிடப்பதை பார்த்து அதிர்ச்சி அடைந்து உடனடியாக வனத்துறையினருக்கு தகவல் தெரிவித்துள்ளார்.
அந்த தகவலின்படி சம்பவ இடத்திற்கு விரைந்து சென்ற வனத்துறையினரின் முதியவரின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.