முகவரி கேட்பது போல நடித்து நகை பறிக்க முயன்ற பெண்ணை காவல்துறையினர் கைது செய்துள்ளனர்.
சென்னை மாவட்டத்திலுள்ள நந்தனம் சி.ஐ.டி நகரில் வனஜா என்பவர் வசித்து வருகிறார். இவர் தனது வீட்டிற்கு அருகே நடந்து சென்று கொண்டிருந்தார். அப்போது அங்கு வந்த பெண் ஒருவர் வனஜாவிடம் முகவரி கேட்பது போல் நடித்து அவர் அணிந்திருந்த தங்க சங்கிலியை பறிக்க முயற்சி செய்துள்ளார். இதனால் அதிர்ச்சி அடைந்த வனஜா தனது சங்கிலியை இறுக்கமாக பிடித்துக்கொண்டு அலறி சத்தம் போட்டுள்ளார். அவரது சத்தம் கேட்டு அக்கம்பக்கத்தினர் விரைந்து சென்று நகையை பறிக்க முயன்ற பெண்ணை மடக்கி பிடித்து காவல்நிலையத்தில் ஒப்படைத்துவிட்டனர்.
இதனை அடுத்து காவல்துறையினர் நடத்திய விசாரணையில் அந்த பெண் அதே பகுதியில் வசிக்கும் ஹசீனா என்பதும், குடும்ப கஷ்டம் காரணமாக நகையை பறிக்க முயன்றதும் தெரியவந்துள்ளது. இதுகுறித்து வழக்குப்பதிவு செய்த காவல்துறையினர் ஹசீனாவை கைது செய்து விசாரணை மேற்கொண்டு வருகின்றனர்.