சாலையில் நடந்து சென்று கொண்டிருந்த கூலித்தொழிலாளி மீது மினி லாரி மோதி உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
தேனி மாவட்டம் உத்தமபாளையத்தை அடுத்துள்ள கோவிந்தன்பட்டியில் உள்ள சர்ச் தெருவில் சூசை ஆரோக்கியம் என்ற சுருளி என்பவர் வசித்து வந்துள்ளார். கூலி தொழிலாளியான இவர் வழக்கம் போல வேலைக்கு செல்வதற்காக உத்தமபாளையம்-கோவிந்தன்பட்டி சாலையில் நடந்து சென்று கொண்டிருந்தார். அப்போது தேனியை நோக்கி சென்று கொண்டிருந்த மினி லாரி ஒன்று திடீரென நிலைதடுமாறி சூசை ஆரோக்கியம் மீது மோதியுள்ளது.
இந்த கோர விபத்தில் சூசை ஆரோக்கியம் பலத்த காயமடைந்து சம்பவ இடத்திலேயே பரிதாபமாக உயிரிழந்துள்ளார். இதனை அறிந்த உத்தமபாளையம் காவல்துறையினர் சம்பவ இடத்திற்கு விரைந்து சென்று சூசை ஆரோக்கியத்தின் உடலை மீட்டு உடற்கூறு ஆய்வுக்கு அரசு மருத்துவமனைக்கு அனுப்பி வைத்துள்ளனர். மேலும் இதுகுறித்து வழக்கு பதிவு செய்து விசாரணை மேற்கொண்டு வருகின்றனர்.