காவல்துறையினர் துப்பாக்கியுடன் சந்தேகத்திற்குரிய பகுதிகளில் ரோந்து செல்ல வேண்டும் என காவல்துறை சூப்பிரண்டு உத்தரவிட்டுள்ளார்.
ராணிப்பேட்டை மாவட்டத்தின் காவல்துறை சூப்பிரண்டு தீபா சத்யன் அரக்கோணம் காவல் நிலையங்களில் திடீர் ஆய்வு செய்துள்ளார். இந்நிலையில் அரக்கோணம் காவல்துறை துணை சூப்பிரண்டு அலுவலகத்தில், காவல்துறை துணை சூப்பிரண்டு புகழேந்திகணேஷ் தலைமையிலான தாலுகா இன்ஸ்பெக்டர்கள் மற்றும் சப்-இன்ஸ்பெக்டர்கள் கூட்டம் நடைபெற்றுள்ளது.
இந்தக் கூட்டத்தில் மாவட்ட காவல்துறை சூப்பிரண்டு தீபா சத்யன் கலந்து கொண்டு அரக்கோணம் அருகாமையில் 4 பேரை தாக்கியும், துப்பாக்கியால் சுட்டும் கொள்ளையடித்த மர்ம நபர்களை தேடும் பணி குறித்து ஆலோசனை மேற்கொண்டுள்ளனர். அதன்பின் தீபா சத்யன் கூறியதாவது, காவல்துறையினர் இரவு நேரங்களில் ரோந்து செல்வது குறித்து ஆலோசனை வழங்கியுள்ளார். அப்போது காவல்துறையினர் துப்பாக்கியுடன் ரோந்து செல்ல வேண்டும் என டி.ஜி.பி சைலேந்திரபாபு உத்தரவிட்டிருந்ததை நினைவுபடுத்தி உள்ளார்.
இதனை அடுத்து ரோந்து பணியில் ஈடுபடும் போது பழைய குற்றவாளிகள் இருக்கும் இடங்கள் மற்றும் சந்தேகத்திற்குரிய இடங்களில் துப்பாக்கியுடன் ரோந்து செல்ல வேண்டுமெனவும், ரயில் நிலையம், பேருந்து நிலையம் நகர் மற்றும் கிராமப்புற பகுதிகளில் ரோந்து பணியில் ஈடுபட்டு, சந்தேகப்படக் கூடிய பகுதிகளில் வாகன சோதனையில் ஈடுபட வேண்டும். மேலும் பொதுமக்கள் பயமின்றி இருக்கும் வண்ணம் தொடர்ந்து இரவு நேர ரோந்து பணியில் காவல்துறையினர் அனைவரும் துப்பாக்கி ஏந்தி செல்ல வேண்டும் என அவர் தெரிவித்துள்ளார்.