உத்தரபிரதேச மாநிலத்தில் ரூ.1.6 கோடியில் புதிதாக அமைக்கப்பட்ட தார் சாலை, ஒரு தேங்காயை உடைத்தபோது சேதமடைந்திருப்பது அதிர்ச்சியை ஏற்படுத்தியுள்ளது. இந்த சாலையை பிஜ்னோர் மாவட்டத்திலுள்ள கெடா அஜிஸ்புரா கிராமத்தில் பாசனத்துறையினர் அமைத்து உள்ளனர். அவர்கள் மேலதிகாரிகளிடம் ஒப்புதல் பெற்று முழு சாலையையும் சீரமைப்பதற்காக, முதல் கட்டமாக சுமார் 700 மீட்டர் தூரத்துக்கு இந்த சாலையை அமைத்துள்ளனர்.
இதனையடுத்து அதன் திறப்பு விழாவுக்கு எம்.எல்.ஏ.வையும் அழைத்துள்ளனர். இந்நிலையில் அந்த சாலையை திறந்து வைக்க வந்திருந்த பாஜக எம்.எல்.ஏ சுசி சவுத்ரி சுபமுகூர்த்த நேரத்தில் தேங்காயை உடைத்து விழாவை தொடங்கினார். அப்போது தேங்காயை உடைத்த இடத்தில் சாலை சேதமடைந்தது. இதனைதொடர்ந்து எம்.எல்.ஏ.வின் கணவர் சுத்தியலால் அந்த சாலையை லேசாக தட்டி பார்த்தார். இந்த நிலையில் அந்த சாலையானது பொடிய தொடங்கியது.
இதனால் ஆத்திரமடைந்த எம்.எல்.ஏ. தரம் குறைந்த பொருட்களை கொண்டு சாலை அமைக்கப்பட்டதை கண்டித்து சாலையில் தர்ணாவில் ஈடுபட்டார். இதனை அறிந்த மாவட்ட கலெக்டர் விசாரணைக்கு உத்தரவிட்டுள்ளார். பாசனப் பிரிவு நிர்வாகப் பொறியாளர் சாலையின் தரம் குறித்து ஆய்வு மேற்கொள்ள சாலையின் மாதிரியை எடுத்து பகுப்பாய்வுக்காக அனுப்பியுள்ளார். மேலும் பிஜ்நோர் மாவட்ட அதிகாரியின் கீழ் விசாரணை நடத்தப்பட்டு வருகிறது.