மோட்டார் சைக்கிள் மீது பேருந்து மோதி விபத்தில் வெல்டிங் பட்டறை உரிமையாளர் உயிரிழந்த சம்பவம் சோகத்தை ஏற்படுத்தியுள்ளது.
திருச்சி மாவட்டத்திலுள்ள சமயபுரம் பகுதியில் வெல்டிங் பட்டறை உரிமையாளரான தேவராஜ் என்பவர் வசித்து வந்துள்ளார். இவர் தனது மோட்டார் சைக்கிளில் வெல்டிங் பட்டறையில் இருந்து வீட்டிற்கு புறப்பட்டுள்ளார். இந்நிலையில் திருச்சி -சென்னை தேசிய நெடுஞ்சாலை கரியமாணிக்கம் பிரிவு அருகே சென்று கொண்டிருந்தபோது அவ்வழியாக வேகமாக வந்த பேருந்து தேவராஜின் மோட்டார் சைக்கிள் மீது பலமாக மோதியது.
இந்த விபத்தில் படுகாயமடைந்த தேவராஜை அருகில் உள்ளவர்கள் மீட்டு மருத்துவமனைக்கு சிகிச்சைக்காக கொண்டு சென்றனர். அங்கு அவரை பரிசோதித்த மருத்துவர்கள் தேவராஜ் ஏற்கனவே இறந்துவிட்டதாக தெரிவித்துள்ளனர். இதுகுறித்து வழக்குப்பதிவு செய்த காவல்துறையினர் பேருந்து ஓட்டுநரான ரகு என்பவரை கைது செய்து விசாரணை மேற்கொண்டு வருகின்றனர்.