கிறிஸ்துமஸ் பண்டிகையை முன்னிட்டு செயின்ட் பீட்டர் பேராலயத்தில் போப் ஆண்டவர் பிரான்சிஸ் சிறப்பு பிரார்த்தனை நடத்தினார்.
கிறிஸ்துமஸ் பண்டிகை உலகம் முழுவதும் கோலாகலமாக கொண்டாடப்பட்டது. இந்நிலையில் கிறிஸ்துமஸ் பண்டிகையை முன்னிட்டு வாடிகன் நகரில் உள்ள செயின்ட் பீட்டர் பேராலயத்தில் போப் ஆண்டவர் பிரான்சிஸ் சிறப்பு பிரார்த்தனை மேற்கொண்டார்.
அப்போது அவர் 2 வருடங்களாக உலகை அச்சுறுத்தி வரும் கொரோனா தொற்று நோய்க்கு முற்றுப்புள்ளி வைக்க பிரார்த்தனை செய்தார். மேலும் பெண்களுக்கு எதிரான வன்முறைகளால் பாதிக்கப்பட்டவர்கள், தனிமையில் இருக்கும் முதியவர்கள், சுகாதாரப் பணியாளர்கள் ஆகியோருக்கு ஆறுதல் மற்றும் அரவணைப்பு வேண்டி அவர் பிரார்த்தித்தார்.
இதனையடுத்து அவர் தேவாலயத்தின் பால்கனியில் நின்றபடி உலக மக்களுக்கு கிறிஸ்துமஸ் உரையை நிகழ்த்தினார். அவர் தனது உரையில் அனைவருக்கும் சுகாதாரப் பாதுகாப்பு, ஏழைகளுக்கான தடுப்பூசிகள் மற்றும் உலகின் மோதல்களை தீர்ப்பதற்கான உரையாடல் போன்றவற்றை வலியுறுத்தினார்.