டெஸ்ட் கிரிக்கெட்டில் இந்திய அணியின் முன்னாள் தொடக்க வீரர் சேவாக்கின் சாதனையை கே.ல்.ராகுல் முறியடித்துள்ளார்.
இந்தியா -தென்னாப்பிரிக்கா அணிகள் இடையேயான முதல் டெஸ்ட் போட்டி செஞ்சூரியன் நேற்று தொடங்கியது. இதில் டாஸ் வென்ற இந்திய அணி பேட்டிங் தேர்வு செய்தது. அதன்படி முதலில் களமிறங்கிய இந்திய அணி முதல் நாள் ஆட்ட முடிவில் 3 விக்கெட் இழப்புக்கு 272 ரன்கள் குவித்தது. இதில் கே.எல்.ராகுல் 122 ரன்னுடன் ஆட்டமிழக்காமல் களத்தில் உள்ளார்.
இது தொடக்க வீரர் கே.எல்.ராகுலுக்கு 7-வது டெஸ்ட் சதமாகும் .இதன்மூலம் ஆசியாவுக்கு வெளியே டெஸ்ட் கிரிக்கெட் தொடக்க வீரராக களமிறங்கி அதிக சதங்கள் கடந்த இந்திய வீரர் சுனில் கவாஸ்கருக்கு (15 சதம்) அடுத்த இடத்தை பிடித்து கே.எல்.ராகுல் சாதனை படைத்துள்ளார். இதில் இந்திய அணியின் தொடக்க வீரரான ஷேவாக் 4 சதங்களுடன் மூன்றாவது இடத்தில் உள்ளார். தற்போது கே.எல்.ராகுல் 5 சதம் எடுத்து சேவாக்கின் சாதனையை முறியடித்துள்ளார்.