தேனி மாவட்டத்திலுள்ள போடியிலிருந்து மேல்மருவத்தூர் ஆதிபராசக்தி கோவிலுக்கு பக்தர்கள் வேனில் சென்றனர். இதனையடுத்து பக்தர்கள் அங்கு சுவாமி தரிசனம் செய்துவிட்டு திரும்பி வந்து கொண்டிருந்தனர். அப்போது நள்ளிரவு தேனி பொம்மையகவுண்டன்பட்டி சாலைப் பிள்ளையார் கோவில் அருகில் வந்தபோது எதிர்பாராதவிதமாக சாலையின் மையத் தடுப்பு சுவரில் மோதி வேன் கவிழ்ந்து விபத்துக்குள்ளானது.
இதனால் வேனில் பயணம் மேற்கொண்ட பக்தர்கள் அதற்குள் சிக்கிக் கொண்டு வெளியே வர முடியாமல் சத்தம் போட்டனர். அதன்பின் அப்பகுதியில் இருந்தவர்கள் ஓடி வந்து அவர்களை மீட்கும் பணியில் ஈடுபட்டனர். இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று மீட்பு பணியில் ஈடுபட்டனர்.
இந்த கோர விபத்தில் போடியை சேர்ந்த சின்னச்சாமி, கவிதா, ராணி, பாண்டியம்மாள் உள்பட 6 பக்தர்கள் பலத்த காயமும், 15 பேர் லேசான காயமும் அடைந்தனர். இதனைதொடர்ந்து அவர்கள் அனைவரும் மீட்கப்பட்டு சிகிச்சைக்காக அரசு மருத்துவ கல்லூரி மருத்துவமனைக்கு கொண்டு செல்லப்பட்டனர். அங்கு அவர்களுக்கு சிகிச்சை அளிக்கப்பட்டு வருகிறது. இது தொடர்பாக காவல்துறையினர் வழக்குப்பதிவு செய்து விசாரித்து வருகின்றனர்.