தமிழகம் முழுவதும் கொரோனா தொற்று காரணமாக ஊரடங்கு விதிக்கப்பட்டு, பள்ளி மற்றும் கல்லூரிகள் மூடப்பட்டிருந்தது. அதன் பின்னர் அரசின் கடுமையான முயற்சியினாலும், மக்கள் தடுப்பூசி மீது செலுத்திய ஆர்வத்தினாலும், தொற்று படிப்படியாக குறைந்தது. இதையடுத்து பள்ளிகள் மற்றும் கல்லூரிகள் திறக்கப்பட்டு நேரடி வகுப்புகள் நடைபெற்று கொண்டிருக்கிறது. இந்த நிலையில் உருமாறிய கொரோனா தொற்றான ஒமைக்ரான் வேகமாக பரவி வருகிறது. இது மக்களிடையே பெரும் அச்சத்தை ஏற்படுத்தியுள்ளது. தற்போது மாணவர்களுக்கு அரையாண்டு விடுமுறை அளிக்கப்பட்டுள்ளது.
ஜனவரி 3-ஆம் தேதி முதல் முன்னதாக பள்ளிகள் அனைத்தும் வழக்கம்போல் சுழற்சி முறை இல்லாமல் திறக்கப்படும் என்று அரசு அறிவித்திருந்தது. ஆனால் தற்போது அரசு வெளியிட்டுள்ள ஆணையின்படி நர்சரி, மழலையர் பள்ளிகள் செயல்பட தடை விதிக்கப்பட்டுள்ளது. 1 முதல் 8-ம் வகுப்பு மாணவர்களுக்கு ஜனவரி 10-ஆம் தேதி வரை பள்ளிகள் நேரடியாக செயல்பட தடை விதிக்கப்பட்டுள்ளது. மேலும் 9 முதல் 12 ஆம் வகுப்பு மாணவர்கள் மற்றும் கல்லூரிகளுக்கு அரசு வெளியிட்டுள்ள நிலையான வழிகாட்டுதல்களைப் பின்பற்றி வகுப்புகள் நடத்த அனுமதி அளிக்கப்பட்டுள்ளது.