சீனாவில் அதிகரித்து வரும் கொரோனா பரவல் காரணமாக புத்தாண்டு கொண்டாட்டங்கள் ரத்து செய்யப்பட்டுள்ளன.
சீனாவில் அதிகரித்து வரும் கொரோனா பரவலை கட்டுப்படுத்தும் வகையில் அந்நாட்டு அரசு எச்சரிக்கையுடன் செயல்பட்டு வருகிறது. அந்த வகையில் தற்போது சீனாவில் உள்ள சியான் நகரத்தில் கடுமையான ஊரடங்கு கட்டுப்பாடுகள் அமலில் உள்ளது. மேலும் மக்கள் வீடுகளில் இருந்து வெளியேற தடைவிதிக்கப்பட்டதோடு, போக்குவரத்து சேவைகள் முற்றிலுமாக முடக்கப்பட்டது.
இருப்பினும் குடும்பத்தில் ஒரு நபர் மட்டுமே அத்தியாவசிய தேவைகளுக்காக இரண்டு நாட்களுக்கு ஒருமுறை மட்டும் வீட்டிலிருந்து வெளியே செல்ல அனுமதி வழங்கப்படுகிறது. இந்த கடுமையான கட்டுப்பாடுகள் அமலில் இருந்தபோதிலும் புதிதாக சியான் நகரில் 161 பேர் கொரோனாவால் பாதிக்கப்பட்டுள்ளனர்.
இந்த நிலையில் சுகாதாரத்துறையினர் சீனாவில் பல்வேறு இடங்களில் பரிசோதனையை தீவிரப்படுத்தி வருகின்றனர். மேலும் சீனாவில் புத்தாண்டு கொண்டாட்டங்களும் அதிரடியாக ரத்து செய்யப்பட்டுள்ளது. அதோடு மட்டுமில்லாமல் பெய்ஜிங்கில் வருகின்ற பிப்ரவரி மாதம் நடைபெற உள்ள ஒலிம்பிக் போட்டிக்காக முன்னெச்சரிக்கை நடவடிக்கைகளும் தீவிரப்படுத்தப்பட்டுள்ளதாக தகவல் வெளியாகியுள்ளது.