மோட்டார் சைக்கிள் மீது லாரி மோதிய விபத்தில் கல்லூரி மாணவர் பலியான சம்பவம் சோகத்தை ஏற்படுத்தியுள்ளது.
மதுரை மாவட்டத்திலுள்ள பாலகிரிஷ்ணாபுரம் கிராமத்தில் சேகர் என்பவர் வசித்து வருகிறார். இவருக்கு பால கார்த்திகேயன் என்ற மகன் இருந்துள்ளார். இவர் அப்பகுதியில் இருக்கும் கல்லூரியில் 3-ஆம் ஆண்டு படித்து வந்துள்ளார். இந்நிலையில் பால கார்த்திகேயன் தனது நண்பரான விக்னேஷ் என்பவருடன் மோட்டார் சைக்கிளில் நாராயணபுரத்திற்கு சென்று கொண்டிருந்தார்.
அப்போது அவ்வழியாக வேகமாக வந்த லாரி பால கார்த்திகேயனின் மோட்டார் சைக்கிள் மீது பலமாக மோதியதால் சம்பவ இடத்திலேயே அவர் பரிதாபமாக உயிரிழந்துவிட்டார். மேலும் படுகாயமடைந்த விக்னேஷை அருகில் உள்ளவர்கள் மீட்டு அரசு மருத்துவமனையில் சிகிச்சைக்காக அனுமதித்துள்ளனர். இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.