வாகன சோதனையில் சிக்கிய மர்ம நபர்களை காவல்துறையினர் கைது செய்துள்ளனர்.
நாகப்பட்டினம் மாவட்டத்திலுள்ள தோப்புத்துறை வடக்கு வீதியில் ஷேக் அப்துல்லா என்பவர் வசித்து வருகிறார். இவர் சில மாதங்களுக்கு முன்பு வீட்டை பூட்டிவிட்டு வெளியே சென்றுள்ளார். அப்போது காரில் வந்த மர்ம நபர்கள் அவரது வீட்டின் பூட்டை உடைத்து உள்ளே புகுந்து பீரோவிலிருந்த 4 பவுன் தங்க காசுகளை திருடியுள்ளனர். இதுகுறித்து அகமதுல்லா காவல்நிலையத்தில் அளித்த புகாரின் பேரில் காவல்துறையினர் அங்குள்ள சி.சி.டி.வி. கேமராவில் பதிவான காட்சிகளை வைத்து ஆய்வு செய்தனர். இதில் மர்ம நபர்கள் ஷேக் அப்துல்லாவின் வீட்டு பூட்டை உடைத்த காட்சிகள் பதிவாகியிருந்தது.
அதை வைத்து காவல்துறையினர் மர்ம நபர்களை தேடும் பணியில் ஈடுபட்டிருந்தனர். இந்நிலையில் வேதாரண்யம் காவல்துறையினர் வாகன சோதனையில் ஈடுபட்டிருந்தபோது அந்த வழியாக சந்தேகப்படும் வகையில் வந்த காரை நிறுத்தி விசாரணை நடத்தியுள்ளனர். அந்த விசாரணையில் அவர்கள் சுரேஷ், மணிகண்டன், தமிழ்செல்வன் என்பதும், சேக் அப்துல்லா வீட்டிலிருந்து 4 பவுன் தங்க காசுகளை திருடியதும் தெரிய வந்துள்ளது. அந்த 3 பேரையும் காவல்துறையினர் கைது செய்து அவர்களிடமிருந்து காரையும், 4 பவுன் தங்க காசுகளையும் பறிமுதல் செய்தனர். அந்த 3 பேரும் பல இடங்களில் திருடி வந்தது தெரியவந்துள்ளது.