சென்னை சைதாப்பேட்டையில் உள்ள பெண்கள் மேல்நிலைப்பள்ளியில் 15 வயது முதல் 18 வயதுள்ள சிறார்களுக்கு தடுப்பூசி செலுத்தும் திட்டத்தை முதல்வர் ஸ்டாலின் தொடங்கி வைத்தார். அதற்கு முன்னதாக பேசிய அவர், ஒமைக்ரான் தற்போது அதிகமாக பரவ தொடங்கியுள்ளது. கொரோனாவில் இருந்து மீண்டு வந்த நமக்கு ஒமைக்ரானால் தடை ஏற்படும் சூழல் ஏற்பட்டுள்ளது. ஒமைக்ரான் தொற்றின் தாக்கம் குறைவாக இருந்தாலும் பரவல் வேகம் அதிகமாக உள்ளது.
அதனால் முககவசம் கட்டாயமாக அணிந்து அனைவரும் பாதுகாப்புடன் இருப்பதுதான் எனக்கு மகிழ்ச்சி. மேலும் தடுப்பூசி நோய் எதிர்ப்பை தொடர்ந்து அளித்து வருகிறது. தடுப்பூசி செலுத்திக் கொண்டால் இறப்பு வீதம் குறைவாக இருக்கும். எனவே அனைவரும் தடுப்பூசி செலுத்தி கொள்ளுங்கள் என்று அன்போடு பணிவோடு மன்றாடி கேட்டுக்கொள்கிறேன். புதிய வைரஸ் தாக்கத்தை தடுத்து நிறுத்துவோம் என்று உறுதி ஏற்போம். இந்த நோயிலிருந்து விடுபட்ட மாநிலம் என்ற பெயரை தமிழகம் எடுக்க வேண்டும். அதற்கு மக்களின் முழு ஒத்துழைப்பு வேண்டும் என்று அவர் தெரிவித்துள்ளார்.