புத்தாண்டு கொண்டாட்டத்தில் வாலிபரை கத்தியால் குத்திய 4 பேரை காவல்துறையினர் கைது செய்துள்ளனர்.
ராணிப்பேட்டை மாவட்டத்தில் உள்ள திருமால்பூர் காலனி பகுதியில் பிரவீன்குமார் என்பவர் வசித்து வருகிறார். இந்நிலையில் இவருக்கும் அதே பகுதியில் வசிக்கும் பிரதாப், லோகேஷ், பிரேம்குமார் மற்றும் நவீன் ஆகியோருக்கும் இடையே முன்விரோதம் இருந்து வந்துள்ளது. அதன்பின் புத்தாண்டு விழா கொண்டாட்டத்தின் போது இருவருக்கு இடையே மோதல் ஏற்பட்டதில் பிரேம்குமார் உள்ளிட்ட 4 பேரும் பிரவீன்குமாரை தாக்கி கத்தியால் வெட்டியதாக கூறப்படுகிறது.
இதனை அடுத்து அருகில் இருந்த பொதுமக்கள் அவர்களை தடுத்து நிறுத்தி காவல்துறையினருக்கு தகவல் தெரிவித்துள்ளனர். அந்த தகவலின் பேரில் சம்பவ இடத்திற்கு விரைந்து சென்ற காவல்துறையினர் படுகாயம் அடைந்த பிரவீன்குமாரை மீட்டு சிகிச்சைக்காக அரசு மருத்துவமனைக்கு அனுப்பி வைத்துள்ளனர். மேலும் இது குறித்து வழக்குப்பதிவு செய்த காவல்துறையினர் பிரேம்குமார் உள்ளிட்ட 4 பேரை கைது செய்துள்ளனர்.