தண்டவாளத்தில் அழுகிய நிலையில் வாலிபர் பிணமாக கிடந்த சம்பவம் பரபரப்பை ஏற்படுத்தியுள்ளது.
திருப்பூர் 2-வது ரயில்வே கேட் அருகில் உள்ள தண்டவாளம் ஓரத்தில் 35 வயது மதிக்கத்தக்க ஆண் ஒருவரின் பிணம் அழுகிய நிலையில் கிடந்துள்ளது. இதனைப் பார்த்த அப்பகுதி மக்கள் இதுகுறித்து ரயில்வே காவல்துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் அந்த வாலிபரின் உடலை உடனடியாக மீட்டு திருப்பூர் அரசு மருத்துவ கல்லூரி மருத்துவமனைக்கு பிரேத பரிசோதனைக்காக அனுப்பி வைத்தனர்.
இந்நிலையில் இறந்து கிடந்த நபர் பச்சை நிறத்தில் சட்டையும், காப்பி கருப்பு நிற கட்டம் போட்ட லுங்கியும் அணிந்துள்ளார் என காவல்துறையினர் தெரிவித்துள்ளனர். மேலும் இறந்து கிடந்த வாலிபர் யார்? எந்த ஊரை சேர்ந்தவர்? என்பது குறித்து காவல்துறையினர் தீவிர விசாரணை நடத்தி வருகின்றனர்.