தொடர்ந்து அடுத்தடுத்த வீடுகளில் மர்ம நபர்கள் கொள்ளை அடித்து சென்றதால் பொதுமக்கள் அச்சத்தில் இருக்கின்றனர்.
திருப்பத்தூர் மாவட்டத்தில் உள்ள குடியானகுப்பம்-நாற்றம்பள்ளி ரோடு பகுதியில் முனுசாமி என்பவர் வசித்து வருகிறார். இந்நிலையில் இவரின் வீட்டின் கதவை உடைத்து மர்ம நபர்கள் கொள்ளையடிக்க முயன்றுள்ளனர். இதேபோல் மாரியம்மன் கோவில் அருகில் வசிக்கும் முத்து பிள்ளை என்பவரின் வீட்டில் பூட்டை உடைத்து ஆயிரம் ரூபாய் பணம், கால் பவுன் தங்க நகை மற்றும் வெள்ளி கொலுசுகள் ஆகியவற்றை மர்மநபர்கள் கொள்ளையடித்துச் சென்றுள்ளனர்.
இதனையடுத்து முத்து பிள்ளையின் பக்கத்து வீட்டில் வசித்து வருகின்ற சேகர் என்பவரின் வீட்டில் பூட்டை உடைத்து 5,000 ரூபாய் பணத்தை மர்ம நபர்கள் கொள்ளையடித்து சென்றுள்ளனர். இதனைத் தொடர்ந்து அதே பகுதியில் வசிக்கும் சுந்தர் என்பவருடைய வீட்டின் கதவை உடைத்து மர்ம நபர்கள் கொள்ளை அடிக்க முயற்சி செய்துள்ளனர்.
மேலும் ஒரே நாளில் அடுத்தடுத்து இரண்டு வீடுகளில் நடந்த கொள்ளை சம்பவம் மற்றும் இரண்டு வீடுகளில் திருட முயன்ற சம்பவத்தால் அப்பகுதி மக்கள் பெரும் அச்சத்தில் உள்ளனர். இது குறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று தீவிர விசாரணை மேற்கொண்டு வருகின்றனர்.