கல்லால் அடித்து வாலிபர் கொலை செய்யப்பட்ட சம்பவம் குறித்து காவல்துறையினர் விசாரணை மேற்கொண்டு வருகின்றனர்.
சென்னை மாவட்டத்திலுள்ள திருவேற்காடு பெரியார் நகர் பகுதியில் இருக்கும் முட்புதர்கள் நிறைந்த காலியிடத்தில் ரத்த காயங்களுடன் வாலிபர் ஒருவர் சடலமாக கிடந்துள்ளார். இதனை பார்த்து அதிர்ச்சி அடைந்த பொதுமக்கள் உடனடியாக காவல்துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் வாலிபரின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர்.
இதுகுறித்து வழக்குப்பதிவு செய்த காவல்துறையினர் நடத்திய விசாரணையில் சடலமாக மீட்கப்பட்ட வாலிபர் பீகார் மாநிலத்தைச் சேர்ந்த சுதிர் குமார் என்பது தெரியவந்துள்ளது. இவர் அயனம்பாக்கம் செல்லியம்மன் நகர் பகுதியில் நண்பர்களுடன் அறை எடுத்து தங்கி வெல்டிங் கம்பெனியில் பணிபுரிந்து வந்துள்ளார். கடந்த வாரம் வீட்டை விட்டு வெளியே சென்ற சுதிர் குமாரை யாரோ கல்லால் அடித்து கொலை செய்துள்ளனர். இந்த வழக்கு குறித்து காவல்துறையினர் பல்வேறு கோணங்களில் விசாரணை மேற்கொண்டு வருகின்றனர்.