ஆடு திருடிய 2 பேரை காவல்துறையினர் கைது செய்துள்ளனர்.
தூத்துக்குடி மாவட்டத்தில் உள்ள ஆறுமுகநேரி பகுதியில் சுடலை மணி என்பவர் வசித்து வருகிறார். இவர் கூலி வேலை செய்து வருகிறார். இவர் தனக்கு சொந்தமான ஆடுகளை அங்குள்ள காட்டு பகுதியில் மேய்ச்சலுக்கு விட்டிருந்தார். இந்நிலையில் மேய்ந்து கொண்டிருந்த ஆட்டில் ஒரு ஆட்டை காணவில்லை. அதனை மர்ம நபர்கள் திருடிச் சென்றது சுடலைமணிக்கு தெரியவந்துள்ளது. இந்நிலையில் சுடலைமணி ஆறுமுகநேரி வார சந்தைக்கு சென்றுள்ளார். அப்போது அங்கு வந்த 2 பேர் அவர்களுடைய ஆட்டை சந்தைக்கு கொண்டு வந்தனர்.
இதனை பார்த்த சுடலை மணி அவர்களை பிடித்து விசாரித்தபோது இருவரும் முன்னுக்குப்பின் முரணாக பேசினர். இந்நிலையில் சுடலைமணி இருவரையும் ஆறுமுகநேரி காவல்நிலையத்தில் ஒப்படைத்தார். இதுகுறித்து சுடலைமணி அளித்த புகாரின் பேரில் வழக்கு பதிவு செய்த காவல்துறையினர் அவர்களிடம் விசாரணை நடத்தினர். அந்த விசாரணையில் அவர்கள் லட்சுமிபுரம் பகுதியில் வசிக்கும் ராமச்சந்திரன், பத்திரலிங்கம் என்பது தெரியவந்துள்ளது. இதனையடுத்து காவல்துறையினர் 2 பேரையும் கைது செய்து ஆட்டை பறிமுதல் செய்தனர். மேலும் இச்சம்பவத்தில் தொடர்புடைய 18 வயது சிறுவனை காவல்துறையினர் தேடி வருகின்றனர்