கொரோனாவால் பாதிக்கப்பட்டவர்களில், 10-ல் ஒருவருக்கு 10 நாட்களுக்கு பின்பும் தொற்று நீடித்திருக்கலாம் என்று புதிய ஆய்வு முடிவு கூறுகிறது. கொரோனா தொற்று பாதிக்கப்பட்டவர்களுக்கு எத்தனை நாட்கள் வரை வைரஸ் உயிர்ப்புடன் இருக்கும் என்பது குறித்து பிரிட்டனில் ஆய்வு மேற்கொள்ளப்பட்டது. ஆர்டிபிசிஆர் பரிசோதனைகளில் பாசிடிவ் என்று வந்த 176 நபர்களின் மாதிரிகளை பகுப்பாய்வு செய்து, ஆய்வு முடிவுகளை கடந்த மாதம் சர்வதேச தொற்று நோய் இதழில் வெளியிட்டுள்ளனர்.
அந்த ஆய்வின்படி ஆர்டிபிசிஆர் பரிசோதனையில் கொரோனா உறுதி செய்யப்பட்டவர்களிடம் இருந்து பெறப்பட்ட மாதிரிகளை, ஆர்என்ஏ அடிப்படையில் ஒரு புதிய வகை பரிசோதனை செய்ததில், சில நோயாளிகளுக்கு தொற்று குறிப்பிட்ட காலத்தை தாண்டி நீடித்திருப்பது கண்டறியப்பட்டது. அது நிலையான 10 நாட்கள் தனிமைப்படுத்தப்பட்ட காலத்தை விடவும் அதிகமாக இருந்தது. அதாவது 10 நாட்களுக்குப் பின்பும், 13 சதவீத நபர்களின் உடலில் கொரோனா வைரஸ் உயிர்ப்புடன் இருந்தது தெரியவந்துள்ளது. இது அவர்கள் இன்னும் நோய்த் தொற்றுடன் இருக்கலாம் என்பதைக் குறிக்கிறது. சில பேருக்கு 68 நாட்கள் வரை இந்த நிலை நீடித்திருக்கிறது.