மின்வேலியில் சிக்கி விவசாயி உயிரிழந்த சம்பவம் சோகத்தை ஏற்படுத்தியுள்ளது.
திருநெல்வேலி மாவட்டத்திலுள்ள பழையபேட்டை காந்திநகரில் விவசாயியான வேலுசாமி என்பவர் வசித்து வந்துள்ளார். இந்நிலையில் விவசாய நிலங்களை பார்வையிடுவதற்காக சென்ற வேல்சாமி நீண்ட நேரமாகியும் வீட்டிற்கு திரும்பி வரவில்லை. இதனால் வேல்சாமியின் உறவினர்கள் அவரை பல்வேறு இடங்களில் தேடி பார்த்தனர். இந்நிலையில் ராமகிருஷ்ணன் என்பவருக்கு சொந்தமான விவசாய நிலத்தில் உடலில் காயங்களுடன் வேல்சாமியின் சடலம் கிடந்ததை பார்த்த பொதுமக்கள் உடனடியாக காவல்துறையினருக்கு தகவல் தெரிவித்துள்ளனர்.
அந்த தகவலின் படி சம்பவ இடத்திற்கு விரைந்து சென்ற காவல்துறையினர் வேல்சாமியின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இதுகுறித்து வழக்குப்பதிவு செய்த காவல்துறையினர் நடத்திய விசாரணையில் காட்டுப்பன்றிகளிடமிருந்து பயிர்களை பாதுகாக்கும் பொருட்டு ராமகிருஷ்ணன் சட்டவிரோதமாக விவசாய நிலத்தை சுற்றி மின்வேலி அமைத்துள்ளார். இதனை அறியாத வேல்சாமி மின்வேலியில் சிக்கி உயிரிழந்தது தெரியவந்துள்ளது.