நாய் சேகர் திரைப்படத்தில் நடிகர் வடிவேலு உடன் இணைந்து நடித்த அனுபவத்தைப் பற்றி பிரசாந்த் என்ற பிரபல யூடியூபர் கூறியிருக்கிறார்.
நகைச்சுவை மன்னனாக வலம் வரும் வைகைப்புயல் வடிவேலு நடித்த நகைச்சுவை கதாபாத்திரங்கள் குழந்தைகள் முதல் பெரியவர்கள் வரை அனைவரையும் கட்டிப் போட்டு வைத்திருக்கிறது. குறிப்பாக, நாய் சேகர், அலர்ட் ஆறுமுகம் மற்றும் கைபுள்ள உட்பட பல கதாபாத்திரங்கள் இன்று வரை நம்மை கவலைகளை மறந்து சிரிக்க வைத்துக் கொண்டிருக்கிறது.
பல திரைப்படங்கள் மூலமாக மக்கள் மனதில் நீங்கா இடம் பிடித்திருக்கிறார் நடிகர் வடிவேலு. எனினும் சில பிரச்சனைகளால் சமீப வருடங்களாக அவர் திரைப்படங்களில் நடிக்கவில்லை. தற்போது, பிரச்சினைகள் எல்லாம் முடிந்து, வடிவேலு மீண்டும் சுறுசுறுப்பாக நடிக்க தொடங்கியிருக்கிறார்.
தற்போது, நாய் சேகர் என்ற திரைப்படத்தில் நடித்துக்கொண்டிருக்கிறார். இத்திரைப்படத்தின் படப்பிடிப்பு வேகமாக நடந்து கொண்டிருக்கிறது. இத்திரைப்படத்தில் பிரசாந்த் என்ற பிரபல யூடியூபரும் நடிக்கிறார். தற்போது அவர் வடிவேலுடன் இணைந்து நடித்த அனுபவத்தை பகிர்ந்திருக்கிறார்.
படப்பிடிப்பு தளத்தில் வடிவேலு நடிப்பிற்காக எவ்வளவு தூரம் வேண்டுமானாலும் போவார். ஒரு காட்சி சரியாக வரவில்லை எனில், அவரையே அவர் திட்டிக் கொள்வார். மேலும், ஒரு காட்சியில் அவர் தன் சட்டையை கிழிக்க வேண்டும். அந்த காட்சியில் எந்தவித ஆர்ப்பாட்டமுமின்றி தன் சட்டையை கிழித்து நடித்திருக்கிறார். மேலும், அவர் எந்தவித பந்தாவும் இல்லாமல் முழுமையான அர்ப்பணிப்புடன் நடிப்பது ஆச்சரியமாக இருப்பதாக பிரசாந்த் கூறியிருக்கிறார்.