சூதாட்டத்தில் ஈடுபட்ட 6 பேரை காவல்துறையினர் கைது செய்துள்ளனர்.
திருப்பூர் மாவட்டத்தில் உள்ள பல்லடம் காவல்துறையினருக்கு அண்ணாநகர் பகுதியில் பணம் வைத்து சூதாட்டத்தில் ஈடுபடுவதாக ரகசிய தகவல் கிடைத்துள்ளது. அந்த தகவலின் படி சம்பவ இடத்திற்கு விரைந்து சென்ற காவல்துறையினர் தீவிர ரோந்து பணியில் ஈடுபட்டுள்ளனர். அப்போது அண்ணாநகர் அம்மா பூங்கா பின்புறம் பணம் வைத்து சூதாட்டத்தில் ஈடுபட்டுக் கொண்டிருந்தனர்.
இதனை பார்த்த காவல்துறையினர் அவர்களை மடக்கிப் பிடித்து விசாரணை நடத்தினர். அந்த விசாரணையில் அவர்கள் அதே பகுதியில் வசிக்கும் ஜோதிபாசு, தமிழ்வாணன், கார்த்திக் உள்ளிட்ட 6 பேர் என்பது காவல்துறையினருக்கு தெரியவந்துள்ளது. மேலும் இதுகுறித்து வழக்கு பதிவு செய்த காவல்துறையினர் 6 பேரையும் கைது செய்ததோடு அவர்களிடம் இருந்த ரொக்கப்பணம் ரூ.3700 மற்றும் சீட்டு கட்டுகளையும் பறிமுதல் செய்தனர்.