ஏழை எளிய மக்களுக்கு 130 கோடியே 20 லட்சம் மதிப்பீட்டில் வீடு கட்டுவதற்கான பணியை முதலமைச்சர் மு. க. ஸ்டாலின் தொடங்கி வைத்துள்ளார்.
சிவகங்கை மாவட்டத்தில் உள்ள கழனிவாசல் பகுதியில் தமிழ்நாடு வீட்டுவசதி வளர்ச்சித்துறை சார்பாக ஏழை எளிய மக்களுக்கு வீடு கட்டுவதற்கான அடிக்கல் நாட்டு விழா காணொளி வாயிலாக நடைபெற்றது. இதில் முதலமைச்சர் மு .க. ஸ்டாலின், மாவட்ட ஆட்சியர் மதுசூதன் ரெட்டி, எம்.எல்.ஏ.க்கள் மாங்குடி, தமிழரசி, கண்காணிப்பு பொறியாளர் சுந்தர்ராஜன் உள்ளிட்ட பலர் கலந்து கொண்டனர். இந்நிலையில் முதலமைச்சர் மு. க. ஸ்டாலின் காணொளி வாயிலாக விழாவைத் தொடங்கி வைத்தார். அதன்பின் மாவட்ட ஆட்சியர் மதுசூதன் ரெட்டி நிபுணர்களிடம் அறிக்கை ஒன்றை வெளியிட்டிருந்தார்.
அதில் 130 கோடியே 20 லட்சம் மதிப்பீட்டில் 900 அடுக்குமாடி குடியிருப்புகள் கட்டபடவுள்ளது. இந்த குடியிருப்புகளில் சுத்தமான குடிநீர், படுக்கையறை, சமையலறை, கழிவறை, மின்சாரம் என அனைத்து பாதுகாப்பு வசதிகளும் உள்ளதாகவும் கூறியுள்ளார். மேலும் இந்த பகுதிகளில் அங்கன்வாடி, பால் வழங்கும் நிலையம், சமுதாயக்கூடம், கடைகள், வாழ்வாதார மையம், நூலகம் என அனைத்து வசதிகளும் விரைவில் அமைக்கப்பட உள்ளதாகவும் அந்த அறிக்கையில் மாவட்ட ஆட்சியர் மதுசூதன் ரெட்டி தெரிவித்துள்ளார்.