ரேஷன் கடையில் திடீர் ஆய்வு மேற்கொண்ட ஆட்சியர் அத்தியாவசிய பொருட்களின் தரம், எடை குறித்து ஆய்வு செய்துள்ளார்.
நாமக்கல் மாவட்டம் தும்மங்குறிச்சியில் உள்ள ரேஷன் கடையில் மாவட்ட ஆட்சியர் ஸ்ரேயா சிங் திடீர் ஆய்வு மேற்கொண்டுள்ளார். இந்நிலையில் ரேஷன் கடையில் பொதுமக்களுக்கு விநியோகம் செய்யப்படும் அத்தியாவசிய பொருட்களின் இருப்பு குறித்து ரேஷன் கடை ஊழியர்களிடம் கேட்டறிந்தார். இதனையடுத்து கடையில் விற்பனையான பொருள்களின் விவரங்கள் மற்றும் அதிநவீன விற்பனை முனைய கருவியினை இயக்கி சோதனை செய்துள்ளார்.
இதனைதொடர்ந்து ரேஷன் கடை குடோனில் வைக்கப்பட்ட அரிசி, பருப்பு, சர்க்கரை, மண்எண்ணெய், துவரம் பருப்பு, உளுந்தம் பருப்பு, பாமாயில் ஆகியவற்றின் எடை, தரம் குறித்தும் ஆய்வு செய்த ஆட்சியர், ரேஷன் கடைக்கு பொருட்கள் வாங்க வந்த வாடிக்கையாளர்களிடம் முறையாக பொருள்கள் விநியோகம் செய்யப்படுகிறதா, அனைத்து பொருட்களும் கிடைக்கிறதா என கேட்டறிந்தார். இந்த ஆய்வின்போது அரசு அதிகாரிகள் பலரும் உடன் இருந்துள்ளனர்.