தமிழகத்தில் தேர்தல் பணிகளில் ஈடுபடும் அலுவலர்களுக்கு, நாளை முதல் 3 கட்டமாக பயிற்சி வகுப்புகள்நடத்த மாநில தேர்தல் ஆணையம் உத்தரவு பிறப்பித்துள்ளது. இது குறித்து மாநிலத் தேர்தல் ஆணையம் செயலர் சுந்தரவல்லி அனைத்து மாவட்ட தேர்தல் அலுவலர்களுக்கும் அனுப்பியுள்ள சுற்றறிக்கையில், நகர்ப்புற உள்ளாட்சி தேர்தல் பணியில் ஈடுபடவுள்ள தேர்தல் பணியாளர்கள் அனைவருக்கும் முதல் கட்ட பயிற்சி வகுப்பை நாளை நடத்த வேண்டும்.
வரும் பிப்ரவரி 9ஆம் தேதி 2ம் கட்ட பயிற்சி வகுப்பு, ஓட்டுப்பதிவுக்கு முந்தைய நாளான பிப்ரவரி 18ஆம் தேதி 3-ம் கட்ட பயிற்சி வகுப்பு நடத்தப்பட வேண்டும். மூன்றாம் கட்ட பயிற்சி வகுப்பு முடிவடைந்ததும் அவர்கள் ஓட்டுச்சாவடிக்கு அனுப்பப்பட வேண்டும். தேர்தல் பணியாளர்களுக்கு, மாநில தேர்தல் ஆணையம் உருவாக்கியுள்ள மென்பொருள் உதவியுடன் ஓட்டுச்சாவடிகள் ஒதுக்கப்பட வேண்டும் என்று அதில் கூறப்பட்டுள்ளது.