செங்குன்றம் அருகே ஏலச்சீட்டில் ரூ 4 கோடி பணம் மோசடி செய்த மனைவி சரணடைந்த நிலையில் கணவன் தலைமறைவாகியுள்ளார்.
செங்குன்றத்தை அடுத்த நல்லூர் ஊராட்சிக்குட்பட்ட ஆட்டந்தாங்கல் பகுதியில் வசிப்பவர் ராமச்சந்திரன். இவருடைய மனைவி பஞ்சவர்ணக்கிளி( வயது47) என்பவர் அந்த பகுதியில் ஏலச்சீட்டு ஒன்று நடத்தி வந்தார். சுமார் 300க்கும் மேற்பட்டோர் இவரிடம் பணம் செலுத்தி ஏலச்சீட்டில் சேர்ந்தனர்.
ஆனால் கணவன்-மனைவி இருவரும் சுமார் 4 கோடி வரை பணம் மோசடி செய்துவிட்டு சீட்டு போட்டவர்களுக்கு பணத்தை திருப்பி கொடுக்காமல் தலைமறைவாகி விட்டனர். இதனால் ஆவடி கமிஷனர் அலுவலகத்தில் பாதிக்கப்பட்ட மக்கள் புகார் மனு ஒன்றை கொடுத்தனர். இதன்பின் சோழவரம் போலீஸ் நிலையத்துக்கு இது பற்றி விசாரிக்கும் படி அந்த புகார் மனு அனுப்பப்பட்டது .
அதன்படி வழக்குப்பதிவு செய்த போலீசார் தலைமறைவான இருவரையும் தேடி வந்தனர்.இந்நிலையில் மதுரை கோர்ட்டில் பஞ்சவர்ண செல்வி சரணடைந்தார். இவரை சோழவரம் போலீசார் அழைத்து வந்து பொன்னேரி நீதிமன்றத்தில் ஆஜர்படுத்தி சிறையில் அடைத்தனர். மேலும் தலைமறைவான அவரது கணவரை போலீசார் வலைவீசி தேடி வருகின்றனர்.