மோட்டார் சைக்கிள் மீது கார் மோதிய விபத்தில் தம்பதியினர் பலியான சம்பவம் பரபரப்பை ஏற்படுத்தியுள்ளது.
திருப்பூர் மாவட்டத்திலுள்ள குன்னத்தூர் பகுதியில் சங்கர் புனிதா தம்பதியினர் வசித்து வந்துள்ளனர். இவர்களுக்கு ஹர்ஷினி என்ற மகளும், கௌரீஸ் என்ற மகனும் இருக்கின்றனர். இதில் ஹர்ஷினி சேலம் மாவட்டத்திலுள்ள புனிதாவின் தங்கை சித்ரா வீட்டில் தங்கியுள்ளார். இந்நிலையில் ஹர்ஷினியை அழைத்து வருவதற்காக சங்கர் தனது மனைவி மற்றும் மகனுடன் மோட்டார் சைக்கிளில் சித்ரா வீட்டிற்கு புறப்பட்டுள்ளார். இவர்கள் வெள்ளியம்பாளையம் பிரிவு அருகே தேசிய நெடுஞ்சாலையில் சென்று கொண்டிருந்தபோது அவ்வழியாக வேகமாக வந்த கார் மோட்டார் சைக்கிள் மீது பயங்கரமாக மோதியது.
இந்த விபத்தில் படுகாயமடைந்த கணவன் மனைவி இருவரும் சம்பவ இடத்திலேயே பரிதாபமாக உயிரிழந்துவிட்டனர். இதனை பார்த்து அதிர்ச்சியடைந்த பொதுமக்கள் படுகாயமடைந்த குழந்தையை மீட்டு மருத்துவமனைக்கு சிகிச்சைக்காக அனுப்பி வைத்துள்ளனர். இதுகுறித்து தகவல் அறிந்த காவல்துறையினர் சம்பவ இடத்துக்கு விரைந்து சென்று சங்கர் மற்றும் புனிதாவின் சடலங்களை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.