இந்தியாவின் நைட்டிங்கேல் என புகழ்ப்பெற்ற பிரபல பாடகி லதா மங்கேஷ்கர் ( வயது 92 ) காலமானார். கொரோனாவால் பாதிக்கப்பட்ட அவர் மும்பையில் உள்ள பிரீச் கேண்டி மருத்துவமனையில் சிகிச்சை பெற்று வந்த நிலையில் சிகிச்சை பலனின்றி இன்று காலை பரிதாபமாக உயிரிழந்தார். இவர் இந்தி, தமிழ் உள்ளிட்ட பல்வேறு மொழிகளில் பல்லாயிரக்கணக்கான பாடல்களை பாடியுள்ளார்.
2001-ல் பாரத ரத்னா, திரைத்துறையின் உயரிய விருதான தாதா சாகேப் விருது உள்ளிட்ட பல்வேறு விருதுகளை பெற்றுள்ளார். இவரது மறைவிற்கு பல்வேறு தலைவர்களும் இரங்கல் தெரிவித்து வருகின்றனர். இந்த நிலையில் லதா மங்கேஷ்கர் மறைவிற்கு குடியரசு தலைவர் ராம்நாத் கோவிந்த் இரங்கல் தெரிவித்துள்ளார்.
மேலும், “லதா மங்கேஷ்கர் மறைவு உலகம் முழுவதும் உள்ள கோடிக்கணக்கானோருக்கு ஏற்பட்டுள்ளதை போலவே எனக்கும் மிகுந்த மன வருத்தத்தை ஏற்படுத்தியுள்ளது. இந்த தெய்வீக குரல் இன்று அமைதியாகிவிட்டது. ஆனால் அவருடைய மெல்லிசைகள் என்றும் அழியாமல் இருக்கும், நித்தியத்திலும் எதிரொலிக்கும். பாரத ரத்னா, லதாஜியின் சாதனைகள் ஒப்பிட முடியாதவை” என்று குடியரசு தலைவர் கூறியுள்ளார்.