டாஸ்மாக் பார் ஊழியர் அடித்து கொலை செய்யப்பட்ட சம்பவம் பரபரப்பை ஏற்படுத்தியுள்ளது.
சென்னை மாவட்டத்திலுள்ள கொருக்குப்பேட்டை எண்ணூர் நெடுஞ்சாலையில் அரசு டாஸ்மாக் கடை அமைந்துள்ளது. இந்த கடைக்கு அருகில் இருக்கும் பாரில் கேரளாவை சேர்ந்த பாபு என்பவர் பணிபுரிந்து வந்துள்ளார். இந்நிலையில் வேலை முடிந்து கடையின் மாடியில் பாபு படுத்து தூங்கியுள்ளார். மறுநாள் காலை உடலில் ரத்த காயங்களுடன் பாபு சடலமாக கிடந்ததை பார்த்து அதிர்ச்சியடைந்த ஊழியர்கள் உடனடியாக காவல்துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற காவல்துறையினர் பாபுவின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர்.
இதுகுறித்து வழக்குப்பதிவு செய்த காவல்துறையினர் பார் உரிமையாளர் ரவிச்சந்திரன், மேற்பார்வையாளர் தட்சிணாமூர்த்தி ஆகியோரிடம் விசாரணை நடத்தியுள்ளனர். அப்போது வேலை கேட்டு வந்த 40 வயது மதிக்கத்தக்க ஊனமுற்ற ஒருவரை பாபுவுடன் இரவு நேரத்தில் தங்க வைத்தோம். இந்த சம்பவம் நடந்த பிறகு அந்த நபரை காணவில்லை. எனவே அவர்தான் பாபுவை அடித்து கொலை செய்திருக்கலாம் என அவர்கள் தெரிவித்துள்ளனர். இதனால் தலைமறைவான அந்த நபரை காவல்துறையினர் தீவிரமாக தேடி வருகின்றனர்.