பள்ளி கல்வித்துறை பிளஸ்-1 மாணவர்களின் கற்றல் திறனை மேம்படுத்தும் விதமாக உற்சாகமூட்டும் தேர்வு நடத்தப்படும் என்று அறிவித்துள்ளது. அதாவது கொரோனா ஊரடங்குக்கு பிறகு தமிழகத்தில் பிப்ரவரி 1-ஆம் தேதி முதல் 1 முதல் 12-ஆம் வகுப்பு வரையிலான மாணவர்களுக்கு நேரடி வகுப்புகள் தொடங்கப்பட்டது. மேலும் ஆசிரியர்கள் நடப்பு கல்வி ஆண்டுக்கான பாட திட்டங்களை விரைந்து முடிக்குமாறு உத்தரவு பிறப்பிக்கப்பட்டது.
ஆனால் 10, 12-ஆம் வகுப்பு மாணவர்களுக்கு கூடுதல் முக்கியத்துவம் வழங்கப்பட்டு வகுப்புகள் நடத்தப்பட்டு வருகிறது. அதேநேரத்தில் 11-ஆம் வகுப்பு மாணவர்களுக்கு பாடத்திட்டத்தை முடிப்பதில் சிரமம் ஏற்பட்டுள்ளதாக கூறப்படுகிறது. ஏனென்றால் இதுவரை அவர்களுக்கு எந்த தேர்வு நடத்தப்படவில்லை. எனவே பொது தேர்வு 11-ஆம் வகுப்புக்கு ரத்தாகுமா ? என்ற கேள்வி எழுந்துள்ளது. இந்த நிலையில் பள்ளிக்கல்வித்துறை பிளஸ்-1 மாணவர்களை தயார்படுத்தும் விதமாக உற்சாகமூட்டும் தேர்வை நடத்த முடிவெடுத்துள்ளது.
இதற்கான ஏற்பாடுகள் பல மாவட்டங்களிலும் தீவிரமாக நடைபெற்று வருகிறது. அதேபோல் இதுவரை நடத்தப்பட்ட பாடங்களிலிருந்து ஒவ்வொரு பாடத்திற்கும் சுமார் 1 1/2 மணி நேரம் தேர்வு நடக்கும் என்று தெரிவிக்கப்பட்டுள்ளது. இருப்பினும் இந்த தேர்வு மாணவர்கள் மத்தியில் பயத்தை ஏற்படுத்தும் விதமாக இல்லாமல் கல்வி கற்கும் ஆர்வத்தை ஊக்குவிக்கும் விதமாக இருக்க வேண்டும் என்று அறிவுறுத்தப்பட்டுள்ளது.