குளத்தில் மூழ்கி பள்ளி மாணவர் உயிரிழந்த சம்பவம் சோகத்தை ஏற்படுத்தியுள்ளது.
திருநெல்வேலி மாவட்டத்திலுள்ள ரெட்டியார்பட்டி பகுதியில் மாரியப்பன் என்பவர் வசித்து வருகிறார். இவர் கூலி வேலை செய்து வருகிறார். இவருக்கு மாரிமுத்து என்ற மகன் இருந்துள்ளார். இவர் மூலக்கரைபட்டியில் உள்ள அரசு மேல்நிலைப்பள்ளியில் பிளஸ் 2 படித்து வந்துள்ளார். இந்நிலையில் மாரிமுத்து இட்டேரி பகுதியில் உள்ள ஒரு குளத்திற்கு குளிக்க சென்றுள்ளார். அப்போது மாரிமுத்து ஆழமான பகுதிக்கு சென்ற போது தண்ணீரில் திடீரென மூழ்கினார்.
இது குறித்து அருகில் இருந்தவர்கள் முன்னீர்பள்ளம் காவல்துறையினருக்கு தகவல் தெரிவித்துள்ளனர். அந்த தகவலின் படி சம்பவ இடத்திற்கு விரைந்து சென்ற காவல்துறையினர் தீயணைப்பு துறையினருக்கு தகவல் தெரிவித்துள்ளனர். அந்த தகவலின்படி சம்பவ இடத்திற்கு விரைந்து சென்ற பாளையங்கோட்டை தீயணைப்புதுறையினர் மாரிமுத்துவை தேடும் பணியில் ஈடுபட்டிருந்தனர். இதனையடுத்து நீண்ட நேரத்திற்கு பிறகு மாரிமுத்துவை தீயணைப்பு துறையினர் சடலமாக மீட்டனர். மேலும் இதுகுறித்து வழக்குப்பதிவு செய்த காவல்துறையினர் விசாரணை நடத்தி வருகின்றனர்.