காளையை மீட்க முயற்சி செய்த போது சேற்றில் சிக்கி கொண்ட 6 பேரை தீயணைப்பு வீரர்கள் பத்திரமாக மீட்டனர்.
புதுக்கோட்டை மாவட்டத்தில் உள்ள திருநல்லூரில் நேற்று முன்தினம் ஜல்லிக்கட்டு நடைபெற்றுள்ளது. இந்த ஜல்லிக்கட்டில் பல்வேறு பகுதிகளில் இருந்து வந்த காளைகள் கலந்து கொண்டன. இந்நிலையில் ஒரு காளை வழிதவறி திருநல்லூரில் இருக்கும் பெரிய குளத்திற்கு சென்றுவிட்டது. இதனை பார்த்ததும் அதே பகுதியில் வசிக்கும் ராமன், தனபால், சுரேஷ், சந்தோஷ், கருப்பையா, தமிழ் ஆகிய 6 பேரும் குளத்தில் இறங்கி காளையை மீட்க முயற்சி செய்துள்ளனர். ஆனால் காளையின் கயிறு தண்ணீரில் இருந்த கருவேல மரத்தில் சிக்கிக்கொண்டது.
இதனால் 6 பேரும் அந்த கயிற்றை அவிழ்க்க முயற்சி செய்தனர். அப்போது எதிர்பாராதவிதமாக 6 பேரும் சேற்றில் சிக்கி வெளியே வர முடியாமல் தவித்தனர். இதுகுறித்து உடனடியாக தீயணைப்பு துறையினருக்கு தகவல் தெரிவிக்கப்பட்டுள்ளது. அந்த தகவலின் படி சம்பவ இடத்திற்கு விரைந்து சென்ற தீயணைப்பு வீரர்கள் கயிறு மூலம் குளத்தில் இறங்கி 6 பேரையும் பத்திரமாக மீட்டனர்.