போதைப்பொருள் நுண்ணறிவு பிரிவு அதிகாரிகள் நடத்திய சோதனையில் 15 கிலோ கஞ்சா பறிமுதல் செய்யப்பட்ட நிலையில் 2 பேரை கைது செய்துள்ளனர்.
தேனி மாவட்டத்தில் கஞ்சா கடத்தலை தடுக்க போதைப்பொருள் நுண்ணறிவு பிரிவு இன்ஸ்பெக்டர் சத்யா தலைமையில் காவல்துறையினர் அனுமந்தன்பட்டி பகுதியில் வாகன சோதனையில் ஈடுபட்டிருந்தனர். இந்நிலையில் அப்பகுதி வழியாக வந்த இருசக்கர வாகனத்தை நிறுத்தி சோதனை செய்ய முயன்றுள்ளனர். ஆனால் காவல்துறையினரை பார்த்ததும் இருசக்கர வாகனத்தில் பின்னால் அமர்ந்து வந்த வாலிபர் அங்கிருந்து உடனடியாக தப்பியோடியுள்ளார்.
இதனை பார்த்த போலீசார் உடனடியாக சக்கர வாகனத்தை ஓட்டி வந்த நபரை வளைத்து பிடித்து விசாரித்தபோது அவர் வருசநாடு பகுதியை சேர்ந்த சுஜித் என்பது தெரியவந்துள்ளது. இதனையடுத்து இருசக்கர வாகனத்தில் இருந்த சாக்கு மூட்டையை சோதனை செய்ததில் அதில் சுமார் 10 கிலோ கஞ்சா இருந்ததும், கேரளாவில் இருந்து கடத்தி வந்ததும் தெரியவந்துள்ளது. அதனை பறிமுதல் செய்த போலீசார் சுஜித்தை கைது செய்து தப்பியோடிய கார்த்திக் என்பவரை தேடி வருகின்றனர்.
இதேபோல் கூடலூரில் நடத்திய சோதனையில் அப்பகுதியை சேர்ந்த முத்துபாண்டி என்பவர் தனது மாட்டுக் கொட்டகையில் கஞ்சா பதுக்கி வைத்திருப்பதாக அதிகாரிகளுக்கு தகவல் கிடைத்துள்ளது. அந்த தகவலின் அடிப்படையில் சம்பவ இடத்திற்கு விரைந்து சென்று நடத்திய சோதனையில் அங்கு பதுக்கி வைக்கப்பட்டிருந்த 5 கிலோ கஞ்சாவை பறிமுதல் செய்துள்ளனர். மேலும் அதனை பதுக்கி வைத்திருந்த மேல கூடலூரை சேர்ந்த ராம்குமாரை கைது செய்த நிலையில் தலைமறைவாக உள்ள முத்துபாண்டியை தேடி வருகின்றனர்.