குளித்துக்கொண்டிருக்கும் போது தண்ணீரில் மூழ்கி சிறுவர்கள் உயிரிழந்த சம்பவம் சோகத்தை ஏற்படுத்தியுள்ளது.
செங்கல்பட்டு மாவட்டத்தில் உள்ள திருக்கழுக்குன்றம் பகுதியில் தொழிலாளியான குமார் என்பவர் வசித்து வருகிறார். இவருக்கு சுகேசன் என்ற மகன் இருந்துள்ளார். இவர் அப்பகுதியில் இருக்கும் பள்ளியில் 5-ஆம் வகுப்பு படித்து வந்துள்ளார். இந்நிலையில் சுகேசன் தனது நண்பனான இளங்கோ என்பவருடன் அப்பகுதியில் இருக்கும் கிணற்றுக்கு குளிக்க சென்றுள்ளார். இந்த சிறுவர்கள் நீண்ட நேரமாகியும் வீட்டிற்கு திரும்பி வராததால் சந்தேகமடைந்த உறவினர்கள் அங்கு சென்று பார்த்துள்ளனர்.
அப்போது சிறுவர்கள் கிணற்றில் சடலமாக கிடந்ததை கண்டு அதிர்ச்சியடைந்த உறவினர்கள் உடனடியாக காவல்துறையினருக்கு தகவல் தெரிவித்துள்ளனர். அந்த தகவலின் பேரில் சம்பவ இடத்திற்கு விரைந்து சென்ற காவல்துறையினர் சிறுவர்களின் சடலத்தை கைப்பற்றி அரசு மருத்துவமனைக்கு பரிசோதனைக்காக அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர் நடத்திய விசாரணையில் குளிக்கும் போது தண்ணீரில் மூழ்கி சிறுவர்கள் பலியானது தெரியவந்துள்ளது.