தனியார் நிறுவன ஊழியரை கத்தியால் குத்திய 3 வாலிபர்களை காவல்துறையினர் வலைவீசி தேடி வருகின்றனர்.
பெரம்பலூர் மாவட்டத்தில் உள்ள சித்தளி கிராமத்தில் பிரபாகரன் என்பவர் வசித்து வருகிறார். இவர் தனியார் நிறுவனத்தில் ஊழியராக வேலை பார்த்து வருகிறார். இந்நிலையில் பிரபாகரன் வேலை முடிந்து தனது மோட்டார் சைக்கிளில் வீட்டிற்கு புறப்பட்டுள்ளார். இவர் சித்தளி வனகாப்பு அலுவலகம் எதிரே மோட்டார் சைக்கிளை நிறுத்திவிட்டு சிறுநீர் கழித்துக் கொண்டிருந்தார். அப்போது மோட்டார் சைக்கிளில் வந்த 3 மர்ம நபர்கள் பிரபாகரனின் கழுத்தில் இருந்த தங்க சங்கிலியை பறிக்க முயற்சி செய்துள்ளனர்.
இதனை தடுத்த பிரபாகரனை மர்ம நபர்கள் ஹெல்மெட்டால் அடித்து கத்தியால் குத்தி விட்டு அங்கிருந்து தப்பிச் சென்றனர். இதனால் படுகாயமடைந்த பிரபாகரனை அருகில் உள்ளவர்கள் மீட்டு மருத்துவமனையில் சிகிச்சைக்காக அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இது குறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.