மேல்நிலை நீர்த்தேக்கத் தொட்டியை சுத்தம் செய்ய சென்ற தொழிலாளிகளை தேனீ கொட்டிய சம்பவம் பரபரப்பை ஏற்படுத்தியுள்ளது.
ராணிப்பேட்டை மாவட்டத்தில் உள்ள மாசாபேட்டை பகுதியில் அன்பு என்பவர் வசித்து வந்துள்ளார். இவர் நகராட்சியில் மேல்நிலை நீர்த்தேக்கத் தொட்டி இயக்குபவராக பணிபுரிந்து வந்துள்ளார். இந்நிலையில் அன்பு மற்றும் அவருடன் பணிபுரியும் தினகரன், சீனிவாசன் ஆகிய 3 பேரும் பூபதி நகர் பகுதியில் இருக்கும் மேல்நிலை நீர்த்தேக்கத் தொட்டியை சுத்தம் செய்வதற்காக சென்றுள்ளனர். அப்போது அங்கிருந்த தேனீகள் 3 பேரையும் சரமாரியாக கொட்டியுள்ளது.
பின்னர் அருகில் இருந்தவர்கள் 3 பேரையும் மீட்டு சிகிச்சைக்காக அரசு மருத்துமனைக்கு அனுப்பி வைத்துள்ளனர். ஆனால் அங்கு அளிக்கப்பட்ட சிகிச்சை பலனின்றி அன்பு பரிதாபமாக உயிரிழந்துள்ளார். இதனையடுத்து சீனிவாசன் மற்றும் தினகரன் ஆகியோர் தொடர்ந்து சிகிச்சை பெற்று வருகின்றனர். மேலும் இது குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.