ஓடும் பேருந்தில் இருந்து தவறி விழுந்து கல்லூரி மாணவன் உயிரிழந்த சம்பவம் சோகத்தை ஏற்படுத்தியுள்ளது.
திருவண்ணாமலை மாவட்டத்தில் உள்ள கருங்காலிகுப்பம் கிராமத்தில் அருள்மணி என்பவர் வசித்து வருகிறார். இவருக்கு அசோக்குமார் என்ற மகன் இருந்துள்ளார். இவர் கீழ்பென்னாத்தூர் அருகில் உள்ள தனியார் பாலிடெக்னிக் கல்லூரியில் 2-ஆம் ஆண்டு படித்து வந்துள்ளார். மேலும் அசோக்குமார் கரிக்கலாம்பாடி பகுதியில் உள்ள தனது பாட்டி வீட்டில் தங்கியிருந்து கல்லூரிக்கு சென்று படித்து வந்துள்ளார். இந்நிலையில் அசோக்குமார் கல்லூரி முடிந்து அங்குள்ள தனியார் பேருந்தில் ஏறி கரிக்கலாம்பாடிக்கு வந்து கொண்டிருந்தார். இதனையடுத்து அசோக்குமார் தனியார் பேருந்தின் முன்பக்க படிக்கட்டில் நின்று பயணம் செய்துள்ளார்.
அப்போது ஓடும் பேருந்தில் இருந்து அசோக்குமார் கீழே விழுந்து சக்கரம் ஏறியதில் தலை நசுங்கி சம்பவ இடத்திலேயே பரிதாபமாக உயிரிழந்தார். இது குறித்து தகவலறிந்த கீழ்பென்னாத்தூர் காவல்துறையினர் சம்பவ இடத்திற்கு விரைந்து சென்று அசோக்குமாரின் உடலை கைப்பற்றி திருவண்ணாமலை அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இது குறித்து வழக்கு பதிவு செய்த காவல்துறையினர் விசாரணை மேற்கொண்டு வருகின்றனர்.