தமிழகத்தில் கடந்த 2 வருடங்களாக கொரோனா பரவல் காரணமாக பள்ளி-கல்லூரிகள் திறக்கப்படாமல் ஆன்லைன் மூலம் வகுப்புகள் நடைபெற்று வந்தது. மேலும் தேர்வுகளும் ரத்து செய்யப்பட்டது. இதையடுத்து நடப்பாண்டு கொரோனா தொற்று குறைந்து வந்த நிலையில் மீண்டும் பள்ளி-கல்லூரிகள் திறக்கப்பட்டு வழக்கம்போல் வகுப்புகள் நடைபெற்று வந்தன. இந்நிலையில் கடந்த டிசம்பர் மாதம் மீண்டும் கொரோனா தொற்று பரவல் உச்சம் தொட தொடங்கியதால் பள்ளி-கல்லூரிகளுக்கு விடுமுறை அறிவிக்கப்பட்டது.
அதன்பின் கொரோனா குறைந்து வரும் நிலையில் கடந்த பிப்ரவரி 1 ஆம் தேதி முதல் பள்ளி-கல்லூரிகள் திறக்கப்பட்டு மாணவர்களுக்கு நேரடி வகுப்புகள் நடைபெற்று வருகின்றன. இதற்கிடையில் 10,11 மற்றும் 12 ஆம் வகுப்பு மாணவர்களுக்கான பொதுத்தேர்வு அறிவிப்புகளும் வெளியிடப்பட்டுள்ளது. இதனால் மாணவர்கள் பொதுத்தேர்வுக்கு தயாராகி வருகின்றனர். இந்நிலையில் 12ஆம் வகுப்பு மாணவர்களுக்கான பொதுத்தேர்வு பதிவெண்கள் வெளியிடப்பட்டுள்ளது. தேர்வெண்ணுடன் கூடிய மாணவர் பட்டியலை www.dge.tn.gov.in என்ற இணையதளத்தில் வரும் 31-ஆம் தேதி வரை தலைமையாசிரியர்கள் பதிவிறக்கம் செய்து கொள்ளலாம் என்று தேர்வுத்துறை இயக்ககம் தெரிவித்துள்ளது.