குளத்தில் மூழ்கி தொழிலாளி உயிரிழந்த சம்பவம் சோகத்தை ஏற்படுத்தியுள்ளது.
புதுக்கோட்டை மாவட்டத்திலுள்ள ராசிபுரத்தில் ஜெகநாதன் என்பவர் வசித்து வந்துள்ளார். இவர் அப்பகுதியில் இருக்கும் தொழிற்சாலையில் தொழிலாளியாக பணிபுரிந்து வந்துள்ளார். இந்நிலையில் சமைப்பதற்கு காய்கறி இல்லாததால் அப்பகுதியில் இருக்கும் மாரியம்மன் கோவில் குளத்திற்கு சென்று மீன் பிடித்து வருகிறேன் என ஜெகநாதன் தனது மனைவியிடம் கூறிவிட்டு சென்றுள்ளார். ஆனால் நீண்ட நேரமாகியும் அவர் வீட்டிற்கு திரும்பி வராததால் சந்தேகம் அடைந்த உறவினர்கள் குளத்திற்கு சென்று பார்த்துள்ளனர். அங்கும் அவர் இல்லாததால் சந்தேகமடைந்த உறவினர்கள் உடனடியாக தீயணைப்பு துறையினருக்கு தகவல் தெரிவித்துள்ளனர்.
அந்த தகவலின்படி சம்பவ இடத்திற்கு விரைந்து சென்ற தீயணைப்பு வீரர்கள் குளத்தின் நடுப்பகுதியில் தாமரை இலைகளுக்கு இடையே மிதந்த ஜெகநாதனின் சடலத்தை மீட்டனர். அதன்பிறகு காவல்துறையினர் ஜெகநாதனின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.