பொறியியல் கல்லூரி மாணவரை தாக்கிய 2 வாலிபர்களை காவல்துறையினர் கைது செய்துள்ளனர்.
தூத்துக்குடி மாவட்டத்திலுள்ள நாலாட்டின்புதூர் வி.பி. சிந்தன் நகர் பகுதியில் ஆறுமுகம் என்பவர் வசித்து வருகிறார். இவருக்கு மந்திரமூர்த்தி என்ற மகன் உள்ளார். இவர் நெல்லை பொறியியல் கல்லூரியில் படித்து வருகிறார். இவரது உறவினர்களான அதே பகுதியில் வசிக்கும் மாயாண்டி, முத்துராஜ் ஆகியோருக்கு இடையே குடும்ப பிரச்சினை இருந்து வந்துள்ளது. இந்நிலையில் தனது வீட்டருகே மந்திரமூர்த்தி நின்று கொண்டிருந்தார்.
அப்போது அங்கு வந்த மாயாண்டி, முத்துராஜ் ஆகிய இருவரும் மந்திரமூர்த்தியிடம் தகராறில் ஈடுபட்டுள்ளனர். மேலும் அவர்கள் மந்திரமூர்த்தியை கல்லால் தாக்கிக் கொலை மிரட்டலும் விடுத்துள்ளனர். இதுகுறித்து மந்திரமூர்த்தியின் தாய் நாகஜோதி நாலாட்டின்புதூர் காவல்நிலையத்தில் புகார் அளித்துள்ளார். அந்த புகாரின் பேரில் வழக்கு பதிவு செய்த காவல்துறையினர் மாயாண்டி, முத்துராஜ் ஆகிய 2 பேரையும் கைது செய்துள்ளனர்.