மோட்டார் சைக்கிள் மீது கார் மோதிய விபத்தில் கல்லூரி மாணவர் பலியான சம்பவம் சோகத்தை ஏற்படுத்தியுள்ளது.
புதுக்கோட்டை மாவட்டத்திலுள்ள மீமிசல் கோட்டயன் தோப்பு பகுதியில் அருண் குமார் என்பவர் வசித்து வருகிறார். இந்நிலையில் அருண்குமார் அதே பகுதியில் வசிக்கும் கல்லூரி மாணவரான பிரதீப் என்பவருடன் மோட்டார் சைக்கிளில் உதிரிபாகங்கள் வாங்குவதற்காக திருச்சிக்கு சென்றுள்ளார். இதனையடுத்து மோட்டார் சைக்கிள் உதிரி பாகங்கள் வாங்கி விட்டு இருவரும் ஊருக்கு புறப்பட்டனர். அப்போது திருச்சி-புதுக்கோட்டை புறவழிச் சாலையில் சென்று கொண்டிருந்தபோது இளங்கோவன் என்பவர் ஓட்டி வந்த கார் மோட்டார் சைக்கிள் மீது பயங்கரமாக மோதியது.
இந்த விபத்தில் படுகாயமடைந்த அருண்குமார் மற்றும் பிரதீப்பை அருகில் உள்ளவர்கள் மீட்டு அரசு மருத்துவமனைக்கு சிகிச்சைக்காக அனுப்பி வைத்தனர். ஆனால் அங்கு அளிக்கப்பட்ட சிகிச்சை பலனின்றி பிரதீப் பரிதாபமாக உயிரிழந்துவிட்டார். இதுகுறித்து வழக்குப்பதிவு செய்த காவல்துறையினர் தீவிர விசாரணை நடத்தி வருகின்றனர்.