மாணவியை கடத்திச் சென்று பாலியல் வன்கொடுமை செய்த வாலிபரை காவல்துறையினர் வலைவீசி தேடி வருகின்றனர்.
திருப்பூர் மாவட்டத்தில் உள்ள காங்கேயம் டவுன் பகுதியில் 16 வயது மாணவி ஒருவர் வசித்து வருகிறார். இவர் அந்த பகுதியில் உள்ள தனியார் பள்ளியில் 11-ம் வகுப்பு படித்து வந்துள்ளார். இந்நிலையில் காங்கேயம் டவுனில் உள்ள தனியார் லாட்ஜ் ஒன்றில் விஜய் என்பவர் வேலை பார்த்து வருகிறார். இவருக்கும் மாணவிக்கும் இடையே பழக்கம் ஏற்பட்டு நெருங்கி பழகி வந்தனர். இந்நிலையில் விஜய் அந்த மாணவியிடம் ஆசை வார்த்தை கூறி கடந்த ஜனவரி மாதம் கடத்திச் சென்றுள்ளார். இந்நிலையில் மாணவியை காணாததால் அவரது பெற்றோர் காங்கேயம் அனைத்து மகளிர் காவல்நிலையத்தில் புகார் அளித்துள்ளனர். அந்த புகாரின் பேரில் வழக்கு பதிவு செய்த காவல்துறையினர் மாணவியை தேடி வந்தனர்.
இந்நிலையில் காங்கேயம் பேருந்து நிலையத்தில் வாலிபர் மாணவியுடன் நிற்பதாக காவல்துறையினருக்கு தகவல் கிடைத்துள்ளது. அந்த தகவலின் படி சம்பவ இடத்திற்கு விரைந்து சென்ற காவல்துறையினர் இருவரையும் பிடிக்க முயன்ற போது விஜய் தப்பி ஓடிவிட்டார். அதன்பின் மாணவியை மீட்டு காவல்துறையினர் விசாரணை நடத்தினர். அந்த விசாரணையில் விஜய் மாணவியை கடத்திச் சென்று பாலியல் வன்கொடுமை செய்ததும் தற்போது மாணவி கர்ப்பமடைந்ததும் தெரியவந்துள்ளது. மேலும் இதுகுறித்து விஜய் மீது போக்சோ சட்டத்தின் கீழ் வழக்கு பதிவு செய்த காங்கேயம் மகளிர் காவல்துறையினர் தப்பி ஓடிய விஜயை வலைவீசிதேடி வருகின்றனர்.