கார் மோதிய விபத்தில் 2 பேர் உயிரிழந்த சம்பவம் சோகத்தை ஏற்படுத்தியுள்ளது.
திருவண்ணாமலை மாவட்டத்தில் உள்ள வெளுங்கனந்தல் கிராமத்தில் ராமன் என்பவர் வசித்து வருகிறார். இவர் விவசாயம் செய்து வருகிறார். இவருக்கு தினேஷ் என்ற மகன் உள்ளார். இவரும் அதே பகுதியில் வசிக்கும் முத்துக்குமார் என்பவரும் மோட்டார் சைக்கிளில் கீழ்பென்னாத்தூருக்கு சென்றுள்ளனர். இதனையடுத்து அங்குள்ள ஒரு கடையில் தர்பூசணி செடிக்கு பூச்சி மருந்து வாங்கிக் கொண்டு மீண்டும் மோட்டார் சைக்கிளில் வீட்டிற்கு திரும்பி வந்து கொண்டிருந்தனர்.
அப்போது திருவண்ணாமலையில் இருந்து வேகமாக வந்த கார் ஒன்று மோட்டார் சைக்கிள் மீது பயங்கரமாக மோதியது. இதில் தினேஷ், முத்துக்குமார் ஆகிய இருவரும் பலத்த காயமடைந்தனர். இதனை பார்த்த அருகில் இருந்தவர்கள் 2 பேரையும் உடனடியாக மீட்டு திருவண்ணாமலை அரசு மருத்துவமனைக்கு சிகிச்சைக்காக அனுப்பி வைத்தனர். அங்கு அளிக்கப்பட்ட சிகிச்சை பலனின்றி 2 பேரும் பரிதாபமாக உயிரிழந்தனர். மேலும் இதுகுறித்து வழக்கு பதிவு செய்த காவல்துறையினர் விபத்தை ஏற்படுத்திய கார் டிரைவரை வலைவீசி தேடி வருகின்றனர்.