சிவகங்கை மாவட்டத்தில் காளைகள் முட்டி 81 பேர் படுகாயமடைந்துள்ளனர்.
தென் தமிழகத்திலேயே மிகவும் பிரசித்தி பெற்ற மஞ்சுவிரட்டு என்றால் அது சிவகங்கை மாவட்டம் சிரவாயில் மஞ்சுவிரட்டு தான். சுமார் 80 ஏக்கர் நிலப் பரப்பளவில் மஞ்சுவிரட்டு போட்டியானது அப்பகுதியில் சிறப்பாக நடத்தப்படும். இதனைக் காண தமிழகத்தின் பல்வேறு பகுதிகளில் இருந்து பொதுமக்கள் குவிந்த வண்ணம் இருப்பர். ஒவ்வொரு ஆண்டும் தை மூன்றாம் தேனாட்சி அம்மன், பெரிய கோவில் அம்மன் உள்ளிட்ட தெய்வங்களுக்கு வழிபாடு செய்து, முன்னோர்களுக்கு அழைப்பு விடுத்து பின் காளைகளுக்கு பூஜை நடத்தபட்டபின் போட்டி நடைபெறும்.
அந்தவகையில் நேற்றைய தினம் காளைகளின் பூஜைகளுக்குப் பின் கோவில் காளைகள் அவிழ்த்து விடப்பட்டன. இதில் 60க்கும் மேற்பட்ட மாடுபிடி வீரர்கள் கலந்துகொண்டனர். தமிழகத்தில் சிவகங்கை ராமநாதபுரம் திருச்சி புதுக்கோட்டை உள்ளிட்ட பல்வேறு பகுதிகளில் இருந்து நூற்றுக்கணக்கான காளைகள் களத்தில் திறக்கப்பட்டன. இதில் காளைகள் அனைத்தும் கூட்டாக திறந்து விடப்பட்டதால், காளைகள் மாடுபிடி வீரர்கள் மற்றும் பொதுமக்களை முட்டி தாக்கியது.
இதில் சுமார் 81 பேர் படுகாயமடைந்தனர். பின் காயமடைந்தவர்கள் அருகே உள்ள பொட்டல் அரசு மருத்து முகாமில் சிகிச்சைக்காக அனுமதிக்கப்பட்டனர். மேலும் பலர் திருப்பத்தூர் மாவட்ட அரசு மருத்துவமனையிலும் சிவகங்கை மருத்துவக் கல்லூரி மருத்துவமனையிலும் சிகிச்சைக்காக அனுமதிக்கப்பட்டனர். பல்வேறு பாதுகாப்பு ஏற்பாடுகளை மேற்கொண்ட பின்பும் காளைகளால் 81 பேர் தாக்கப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.