தொழிலாளியை கத்தியால் குத்திய வாலிபரை காவல்துறையினர் கைது செய்துள்ளனர்.
சிவகங்கை மாவட்டத்தில் உள்ள சீதளி கீழ்கரை பகுதியில் முகமதுரியாசுதீன் என்பவர் வசித்து வருகிறார். இவர் அதே பகுதியில் உள்ள தள்ளுவண்டி கடைக்கு சிக்கன் சாப்பிடுவதற்காக சென்றுள்ளார். அப்போது அங்கு நின்று கொண்டிருந்த தொழிலாளி முகமது யாசின் என்பவரது முகத்துக்கு நேராக சிகரெட் பிடித்து புகையை விட்டுள்ளார். இதனால் இரண்டு பேருக்கும் இடையே தகராறு ஏற்பட்டுள்ளது. இந்நிலையில் ஆத்திரம் அடைந்த முகமது ரியாசுதீன் கத்தியை கொண்டு முகமதுயாசினை சரமாரியாக குத்தியுள்ளார்.
இதில் படுகாயம் அடைந்த முகமதுயாசினை அருகில் இருந்தவர்கள் மீட்டு சிகிச்சைக்காக அரசு மருத்துவமனையில் அனுமதித்துள்ளனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து முகமதுயாசின் காவல்நிலையத்தில் புகார் அளித்துள்ளார். அந்த புகாரின் பேரில் வழக்குப்பதிவு செய்த காவல்துறையினர் முகமதுரியாசுதீனை கைது செய்து தீவிர விசாரணை மேற்கொண்டு வருகின்றனர்.