கடம்பூர் பேரூராட்சி தேர்தலில் ஏற்பட்ட தகராறு தொடர்பான புகார்கள் அதில் பதிவான வழக்குகள் போன்ற ஆவணங்களை தாக்கல் செய்ய மாநில தேர்தல் ஆணையத்திற்கு சென்னை உயர்நீதிமன்றம் உத்தரவு பிறப்பித்துள்ளது.
தூத்துக்குடி மாவட்டம் கடம்பூர் பேரூராட்சி தேர்தலை ரத்து செய்து பிப்ரவரி 7ஆம் தேதி மாநில தேர்தல் ஆணையம் பிறப்பித்த உத்தரவை எதிர்த்து பேரூராட்சியில் 3 வார்டுகளில் சுயேச்சை வேட்பாளர்கள் வழக்கு தொடர்ந்துள்ளனர்.இந்நிலையில் 1வது வார்டு சுயேச்சை வேட்பாளர் எஸ்.வி.எஸ்.பி.நாகராஜா, 2வது வார்டு சுயேச்சை வேட்பாளர் ராஜேஸ்வரி, 11 வது வார்டு வேட்பாளர் சிவகுமார் தாக்கல் செய்த மனுக்களில், மூன்று வார்டுகளிலும் திமுக சார்பில் வேட்புமனு தாக்கல் செய்த ஜெயராஜ், சண்முகலட்சுமி, சின்னதுரை ஆகியோரின் வேட்புமனுக்களை முன்மொழிந்தவர்களின் கையெழுத்துகள் போலியாக பதிவு செய்யப்பட்டதாகவும், வேட்பு மனு பரிசீலனையின்போது மூன்று வார்டுகளிலும் முன்மொழிந்ததாக கூறப்பட்டவர்கள் ஆட்சேபம் தெரிவித்ததால் மூன்று திமுக வேட்பாளர்களின் வேட்புமனுக்கள் நிராகரிக்கப்பட்டதாக தெரிவித்துள்ளனர்.
இந்நிலையில் வேறு வேட்பாளர்கள் இல்லாத நிலையில் தங்களை வெற்றி பெற்றவர்களாக அறிவிக்காமல் ஒட்டுமொத்த பேரூராட்சியின் தேர்தலை ரத்து செய்து பிப்ரவரி 7ஆம் தேதி உத்தரவிட்டுள்ளதாகவும், அரசியல் நிர்பந்தம் நெருக்கடி காரணமாக தேர்தலை ரத்து செய்துள்ளதாக மனுவில் குறிப்பிட்டுள்ளனர். 3 வார்டுகளில் தேர்தலை ரத்து செய்த உத்தரவை தங்களை வெற்றி பெறுபவர்கள் ஆக அறிவிக்க வேண்டும் எனவும் கோரிக்கை விடுத்திருந்தனர். மேலும் இந்த மனுக்கள் தலைமை நீதிபதி முனீஸ்வரர் பண்டாரி மற்றும் நீதிபதி பாரத சக்கரவர்த்தி அடங்கிய அமர்வு முன்பு விசாரணைக்கு வந்துள்ளது. அப்போது மாநில தேர்தல் ஆணையம் தரப்பில் இரு வேட்பாளர்கள் கடத்தப்பட்டது,மற்றும் அதிகாரிகள் மீதான தாக்குதல், சட்டம் ஒழுங்கு பிரச்சினை போன்றவற்றின் காரணமாக தேர்தல் ரத்து செய்யப்பட்டதாக கூறப்பட்டது.
ஆனால் மனுதாரர்கள் தரப்பில் யாரும் கடத்த வில்லை, எனவும் சம்பந்தப்பட்டவர்களை கோவில்பட்டி நீதிமன்றத்தில் ஆஜராகி வாக்குமூலம் அளித்ததாக தெரிவிக்கப்பட்டுள்ளது. இதனை தொடர்ந்து கடம்பூர் பேரூராட்சி தேர்தல் தொடர்பான புகார்கள் பதிவான வழக்குகள் சாட்சிகளின் வாக்குமூலங்கள் போன்றவற்றை தாக்கல் செய்ய மாநில தேர்தல் ஆணையம் உத்தரவிட்ட நீதிபதிகள் வழக்கு விசாரணையை ஏப்ரல் 25ஆம் தேதிக்கு ஒத்திவைத்து தீர்ப்பளித்தனர்.