மோட்டார் சைக்கிள் மீது வேன் மோதிய விபத்தில் சிறுமியும், அவரது தாய் மாமாவும் பலியான சம்பவம் சோகத்தை ஏற்படுத்தியுள்ளது.
சேலம் மாவட்டத்தில் உள்ள ஈச்சம்பட்டி கிராமத்தில் வேலுமணி என்பவர் வசித்து வருகிறார். இவருக்கு 13 வயதுடைய அவந்திகா என்ற மகள் இருந்துள்ளார். இந்த சிறுமி தனது பாட்டி வீட்டில் தங்கியிருந்து 8-ஆம் வகுப்பு படித்து வந்துள்ளார். இந்நிலையில் நேற்று அவந்திகாவை அவரது தாய் மாமா மாரிமுத்து என்பவர் மோட்டார் சைக்கிளில் ஈச்சம்பட்டி கிராமத்திற்கு அழைத்து சென்றுள்ளார். இந்நிலையில் மூரார்பாளையம் அருகே சென்று கொண்டிருந்த போது பழனி முருகன் கோவில் நோக்கி சென்ற வேன் மாரிமுத்துவின் மோட்டார் சைக்கிள் மீது பயங்கரமாக மோதியது.
இந்த விபத்தில் படுகாயமடைந்த மாரிமுத்து மற்றும் அவந்திகா ஆகிய இருவரும் சம்பவ இடத்திலேயே பரிதாபமாக உயிரிழந்துவிட்டனர். மேலும் கட்டுப்பாட்டை இழந்த வேன் சாலையோரம் இருந்த மரத்தின் மீது மோதி நின்றது. இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று மாரிமுத்து மற்றும் அவந்திகா ஆகிய 2 பேரின் சடலங்களையும் கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.