இசையுலகில் மிகப் பெரிய விருதுகளில் ஒன்றாக கருதப்படும் கிராமி விருதுகள் இன்று காலை கோலாகலமாக தொடங்கியுள்ளது. கடந்த 1959-ம் வருடம் முதல் ஆண்டுதோறும் இந்த விருது நிகழ்ச்சி நடத்தப்பட்டு வருகிறது. இப்போது அமெரிக்காவின் லாஸ் வேகாஸ் நகரிலுள்ள எம்ஜிஎம் கிராண்ட் கார்டன் அரேனாவில் 64வது கிராமி விருதுகள் நிகழ்ச்சி நடைபெற்று வருகிறது.
இந்த கிராமி விருதுகள் வழங்கும் நிகழ்ச்சியில் இசைத் துறையில் சிறந்த பங்களிப்பாற்றும் கலைஞர்களுக்கு பல பிரிவுகளில் விருதுகள் வழங்கி கௌரவிக்கப்படும்.
இந்த ஆண்டு நிகழ்ச்சியை ட்ரவர் நோவா தொகுத்து வழங்கி வருகிறார். இவற்றில் 86 பிரிவுகளில் விருதுகள் வழங்கப்பட்டு வருகிறது. இந்த நிலையில் இந்திய திரை உலகில் முன்னணி இசை அமைப்பாளராக வலம் வருகிற ஏ.ஆர்.ரகுமான் அவருடைய மகன் ஏ.ஆர்.அமீனுடன் கிராமி விருதுகள் நிகழ்ச்சியில் கலந்துகொண்டுள்ளார். அப்போது விழாவில் இருவரும் எடுத்துக் கொண்ட புகைப்படத்தை ஏ.ஆர்.ரகுமான் சமூகவலைத்தளப் பக்கத்தில் பகிர்ந்துள்ளார். இந்த புகைப்படம் தற்போது லைக்குகளை குவித்து வைரலாகி வருகிறது.